Pas 11 vitesh në kërkim ndërkombëtar, një shtetas shqiptar i akuzuar për trafik droge është arrestuar në Mbretërinë e Bashkuar, në kuadër të bashkëpunimit mes Interpol Tiranës dhe autoriteteve britanike.
Sipas dokumenteve të Gjykatës së Ekstradimeve në Westminster, i arrestuari është 37-vjeçari Gëzim Çela. Autoritetet shqiptare kanë lëshuar ndaj tij urdhër arrest ndërkombëtar, pasi dyshohet se në tetor të vitit 2015 ka qenë pjesë e një grupi kriminal që trafikoi 49 kilogramë kanabis drejt Kosovës.
Çela do të dalë para gjykatës britanike më 4 qershor, ku do të shqyrtohet kërkesa për ekstradimin e tij. Ndërkohë, Ministria e Drejtësisë në Shqipëri ka 40 ditë afat për të dorëzuar dokumentacionin përkatës dhe garancinë ligjore për të drejtën e rigjykimit, pasi ai është dënuar në mungesë. Gjykata britanike ka vendosur që 37-vjeçari të mbetet në paraburgim deri në përfundim të procedurave, duke vlerësuar se akuzat ndaj tij lidhen me një vepër të rëndë penale.
