Janë publikuar pamje të tjera nga brenda hotelit në zonën e Orikumit, ku pati një përplasje mes biznesmenëve Vasil Bedinaj i "Regina Hotel" dhe Luan Muça i "Delta Group". Nga pamjet shihet momenti kur personat e armatosur me pistoleta në dorë futen në ambientet e hotelit.
Në një moment, ata bisedojnë në një tavolinë, dhe disa persona të tjerë duket se ruajnë në distancë. Pas një kohe të shkurtër shihen edhe diskutimet dhe më pas lëvizin nga ambientet e hotelit.
Ngjarja ndodhi rreth orës 12:30 të ditës së enjte. Mollë sherri mes dy biznesmenëve thuhet se është bërë një çështje pronësie. Mes palëve ka pasur edhe një konflikt fizik dhe policia thotë se grupi i Muçës i ka vënë një gjobë prej 5 milionë eurosh Bedinajt ose duhej të largohej brenda 48 orësh nga Shqipëria.
Më pas autorët janë larguar nga ambientet e hotelit. Gjatë largimit personat e grupit të Muçës janë pikasur nga policia. Ata janë kthyer tek rrethi i Orikumit kanë ndjekur rrugën drejt bypass-it dhe në një momement, tre prej tyre janë aksidentuar, ku makina tip 'Range Rover' me të cilën udhëtonin u përmbys.
Të plagosurit janë transportuar me ambulancë drejt spitalit. Në 'Range Rover' u gjet gjatë kontrolleve një armë zjarri tip pistoletë. Veç aksidentit gjatë ndjekjes së njëri-tjetrit grupi i Bedinajt ka qëlluar me armë në ajër, ndërsa raportohet se gjatë kontrolleve të një makine në Fier janë konstatuar dy plumba brenda mjetit. /LAPSI.al
