Kryeministri Edi Rama ka reaguar pas raportimeve për bllokimin e rreth 200 llogarive në rrjete sociale të personave që kanë pasqyruar protestën. Me anë të një postimi në "X", Rama ka sulmuar grupimin e Demokratëve Evropianë, të cilët thanë se qeveria duhet të japë përgjigje në lidhje me mbylljen e profileve në rrjete sociale.
Në postimin e tij, Rama iu referohet si “agjitatorë”, të cilët sipas tij kanë publikuar një insinuatë të turpshme. Kryeministri mohon se qeveria e tij ka gisht në çaktivizimin dhe kufizimin e llogarive në rrjete sociale, duke pretenduar se nuk kanë as kapacitetin për të kryer një operacon të tillë.
“Si mund ta quajnë veten demokratë këta agjitatorë, ndërkohë që publikojnë një aludim kaq të paturpshëm vizual? Kam jetuar me lojërat e fajësimit dhe turpit të kundërshtarëve të mi për aq kohë sa kam qenë në politikë.
Por kur kjo formë e ulët propagande vjen nga njerëz që parakalojnë si demokratë evropianë, është vërtet për të ardhur keq. Po sikur e gjithë kjo dredhi të vijë nga të njëjtat burime dashakeqe që nxitën të ashtuquajturin “Revolucion Flamingo”, shumë prej të cilëve nxitën edhe kaosin në Ceuta?
Pse? E thjeshtë: t’i japim jetë një “revolucioni” që tashmë është shuar. A nuk ka kuptim kjo? Sigurisht që po. Por me sa duket jo vetëm për këta demokratë në emër.
Pra, le të jem absolutisht i qartë: ne nuk kemi të bëjmë fare me çaktivizimin ose kufizimin e ndonjë llogarie në mediat sociale, as nuk kemi aftësinë teknike për të kryer një operacion të këtij lloji. Turp për të gjithë këtë bandë dështimesh që përhapin gjëra të tilla të pakuptimta????“" - shkruan Rama.
Kurse kujtdo që flet shqip dhe shpërndan nëpër kanalet sociale dozën e helmit të radhës, kësaj radhe për këtë censurën e sofistikuar të profileve, i them se në qoftë e vërtetë kjo punë, jo vetëm regjimi im diktatorial që nuk ka ndaluar asnjë lloj proteste dhe ka përballuar me buzëqeshje tërë lumenjtë e sharjeve me libër shtëpie poshtë dritares, s’ka asnjë lidhje në këtë mes, por për më tepër, as ky shtet dhe as shumica dërmuese e shteteve të këtij planeti, nuk kanë asnjë kapacitet që ta bëjnë një gjë të tillë" - shkruan Rama në “X”.
