Aktorja e njohur Ana de Armas duket se po e bën gjithnjë e më publike lidhjen e saj me muzikantin venezuelian Alberto “Beto” Montenegro. Një detaj në postimin e saj të fundit në Instagram ka tërhequr vëmendjen e fansave, duke rikthyer në qendër të vëmendjes jetën private të yllit të Hollywood-it.
38-vjeçarja ndau me ndjekësit një seri fotografish nga udhëtimi i saj në Paris, ku mori pjesë edhe në Javën e Modës. Mes imazheve nga qyteti francez, vëmendjen më të madhe e mori fotografia e fundit, ku shfaqeshin dy kartela tavoline me emrat Ana de Armas dhe Alberto Montenegro, të vendosura pranë njëra-tjetrës gjatë një darke. Edhe pse këngëtari nuk shfaqej në fotografi, ky detaj u interpretua si një tjetër shenjë e afërsisë mes tyre.
Thashethemet për një romancë mes tyre qarkullojnë prej muajsh. Në gusht, të dy u fotografuan duke u puthur dhe duke shëtitur dorë për dore gjatë pushimeve në Formentera të Spanjës. Ata u panë gjithashtu duke shijuar një shëtitje me varkë në perëndim të diellit.
Kush është Beto Montenegro?
Alberto “Beto” Montenegro është këngëtar dhe kitarist venezuelian, i njohur si vokalisti kryesor i grupit muzikor Rawayana, i formuar në vitin 2007. Muzikanti ka ndërtuar karrierën e tij në skenën latinoamerikane, ndërsa lidhja e përfolur me aktoren e njohur të Hollywood-it ka shtuar interesin e publikut për jetën e tij personale.
