Historia daton që prej marsit të vitit 2017. Dy shqiptarë të armatosur me pistoleta hynë në një kafene në Bazel të Zvicrës dhe njëri prej tyre vrau “me gjakftohtësi” dy burra dhe plagosi rëndë një të tretë. U dëgjuan 5 të shtëna.
Një prej autorëve u gjykua në shtator të 2018-ës dhe u dënua me burgim të përjetshëm. I dyti, një 53-vjeçar shqiptar, do të dalë të hënën para gjykatës penale të Bazelit për t'u përgjigjur për veprimet e tij. Pas vrasjeve ai u arratis, ndryshe nga bashkëpunëtori i tij, një 48-vjeçar shqiptar. Ky i fundit u dorëzua vullnetarisht që të nesërmen në një patrullë policie.
Mediat zvicerane shkruajnë se viktimat u identifikuan si Mirjan B., 28 vjeç dhe Gent S., 39 vjeç ndërsa i plagosur mbeti Festim D., 24 vjeç. Një nga viktimat, Mirjan B, kishte shkuar në Zvicër nga Italia. Personi i parë i cili është qëlluar me armë ishte Festim D.
I akuzuari është i njohur për policinë. Ai ishte dënuar disa herë dhe është burgosur për disa vite për trafik droge në Zvicër, Gjermani dhe Holandë. Krimi i tij i përgjakshëm i vitit 2017 dyshohet se kishte për qëllim "të demonstronte dhe konsolidonte fuqinë e grupit të tyre" thuhet në aktakuzë. Ekspertët i kanë lidhur këto vrasje me mafian shqiptare. Ajo mendohet të ishte një larje hesapesh për borxhe të papaguara. Një nga bastionet e kësaj organizate kriminale ndodhet në Bazel thotë eksperti të çështjeve të mafias Jürgen Roth.
Autoritetet nuk janë të sigurt se kush i qëlloi 5 plumbat. Për këtë arsye prokuroria kishte akuzuar tashmë bashkëpunëtorin në vitin 2018 si autor. Dhe edhe nëse rezulton se nuk është kështu, ulja e dënimit të tij mbetet e pamundur, sepse ai ishte plotësisht i përfshirë në vrasje, sipas prokurorit. “Ai veproi pa skrupuj dhe donte të vinte në rrezik drejtpërdrejt jetën e njerëzve” – tha prokurori. ©LAPSI.al
