Presidenti serb Aleksandër Vuçiç ka bërë të pa-interesuarin për propozimin e kryeministrit Edi Rama për çështjen e asociacionit të komunave me shumicë serbe në Kosovë. Në një intervistë për mediat vendase, Vuçiç ka thënë se e respekton kryeministrin Rama, por shtoi se ai nuk është i autorizuar të hartojë statutin e Asociacionit të komunave me shumicë serbe.
“Me sa di unë, Edi Rama nuk është anëtar i Ekipit Menaxhues Serb. As kryeministri i Kosovës Albin Kurti, i cili duket se dëshiron të bëhet pjesë e atij ekipi, pasi edhe ai ka diçka të shkruar, por nuk ka të drejtë ta shkruajë”, - ka thënë Vuçiq për TV Happy.
Edhe pak ditë më parë Vuçiç këmbënguli se draftin për Asociacionin u takon vetëm serbëve ta bëjnë.
“Kur dëgjoni që Kurti ka propozimin e tij për Asociacionin e Komunave Serbe, se Rama ka propozimin e tij për Asociacionin e Komunave Serbe, që disa OJQ kanë propozimin e tyre për Asociacionin e komunave serbe, asnjëri prej tyre nuk ka të drejtë të ketë propozime. Ai propozim duhet të bëhet nga serbët dhe ekipi menaxhues i përbërë nga serbët”, - tha Vuçiç.
Kryeministri Edi Rama njoftoi javën e kaluar se ka përgatitur një draft për Asociacionin e Komunave serbe në Veri të vendit, duke pretenduar se përmes këtij drafti propozon një zgjidhje për krizën në Kosovë. Drafti sipas Ramës është hartuar pa marrë dakordësinë dhe pa u konsultuar me kryeministrin Albin Kurti. Kryeministri i Shqipërisë tha se dokumenti është konfidencial dhe se me kontributin e tij është hartuar nga ekspertë të pavarur.
Ky vendim i Ramës ka shkaktuar reagime nga deputetë e figura politike në Kosovë. Vetë kryeministri Albin Kurti tha të martën se “Rama duhet t’ia dorëzojë draftin Vuçiçit për shqiptarët e Luginës së Preshevës". Ky shkëmbim replikash bëri që të anulohet edhe mbledhja e përbashkët e qeverive që duhet të mbahej të mërkurën në Gjakovë. ©LAPSI.al
