Ish-kreu i PD-së Lulzim Basha ka reaguar pas zhvillimeve të fundit në mbledhjen e Kryesisë së PD.
Basha e cilëson “debat konstruktiv” duke theksuar se është shenjë e qartë e një reflektimi të thellë që ka nisur brenda familjes tonë politike.
Sipas tij, debatet dhe mendimi ndryshe duhen respektuar nga të gjithë. Ai thekson më tej se refuzon dhe dënon me forcë çdo përpjekje për tensionim që ushqen kulturën e vjetër politike të baltës dhe shantazhit me të cilën jemi ndarë njëherë e mirë dhe që duhet lënë pas.
"Fryma e debatit konstruktiv me të cilën Kryesia e PD debatoi për më shumë se 8 orë për gjetjen e rrugës më të mirë në funksion të riorganizimit të PD, është shenjë e qartë e një reflektimi të thellë që ka nisur brenda familjes tonë politike.
Nuk ka gjë më demokratike se mendimet e ndryshme në një forum politik. Debatet dhe mendimi ndryshe duhen respektuar nga të gjithë. Vlerat demokratike që na drejtojnë në këtë rrugëtim të vështirë për ne demokratët nuk mund të cenohen nga asnjë individ.
Refuzoj dhe dënoj me forcë çdo përpjekje për tensionim që ushqen kulturën e vjetër politike të baltës dhe shantazhit me të cilën jemi ndarë njëherë e mirë dhe që duhet lënë pas."
