Më shumë se 120 persona kanë humbur jetën dhe 850 të tjerë janë plagosur në një përplasje mes dy trenave në Odisha, shtetin lindor të Indisë. Më shumë se 200 ambulanca u dërguan në vendngjarje. Një tren pasagjerësh mendohet se ka dalë nga shinat para se të goditej nga një tjetër në shinat ngjitur.
Duke folur me gazetarët në vendin e përplasjes, zyrtari i Shërbimeve të Zjarrfikësve, Sudhanshu Sarangi konfirmoi gjetjen e 120 trupave të pajetë. Ai paralajmëroi se shifrat "mund të rriten” deri në kontrollin e të gjithë vagonëve të përmbysur. Më shumë se 100 mjekë janë mobilizuar. Përpjekjet e shpëtimit sipas tij janë maksimale.
Kryeministri indian Narendra Modi tha se ishte i shqetësuar nga incidenti dhe mendimet e tij ishin me familjet e viktimave. Një i mbijetuar tha se "10 deri në 15 njerëz ranë mbi mua kur ndodhi aksidenti dhe gjithçka u përmbys. Unë isha në fund të grumbullit. Unë u lëndova në dorë dhe në pjesën e pasme të qafës. Kur dola nga vagoni i trenit, pashë dikë që kishte humbur dorën, dikush kishte humbur këmbën, ndërsa fytyra e dikujt ishte e shtrembëruar" - tha i mbijetuari.
Besohet se disa vagona kanë dalë nga shinat dhe kanë përfunduar në anën e kundërt. Një tjetër tren më pas mendohet se ka goditur vagonët e përmbysur. Zyrtarët indianë thanë se edhe një tren mallrash - i cili ishte i palëvizshëm në vend - ishte gjithashtu i përfshirë në incident. Ata nuk dhanë detaje të mëtejshme. ©LAPSI.al
