Sërish ka pasur reagime nga SHBA në lidhje me tensionet në veri të Kosovës.Këtë radhë ka qenë anëtari i Komisionit për Punë të Jashtme të Senatit Amerikan, Chris Murphy, që ka përmendur disa pika të cilat sipas tij çojnë në uljen e tensioneve në katër komunat veriore të Kosovës. Në një postim në Twitter, Murphy u shpreh se njësitet speciale të Policisë së Kosovës duhet të tërhiqen. Ai ka vijuar se Serbia duhet të ndërmarrë hapa të vërtetë për t’u dhënë fund protestave, duhet të caktohen zgjedhje të reja, të mundësohet qasja e kufizuar në ndërtesat komunale vetëm për nëpunësit civilë si dhe të respektohen marrëveshjet e mëparshme Serbi-Kosovë – përfshirë Asociacionin e Komunave me shumicë serbe.
