Aeroporti i Rinasit është totalisht jashtë funksionit, pasi ministrja e Infrastrukurës, Belinda Balluku dështoi të arrijë një marrëveshje me kontrollorët që kanë hyrë në protestë.
Kontrollorët kishin njoftuar për grevë që ditën e djeshme.
Ç’po ndodh në Rinas/ Të mërkurën rrezikohet të mos ulet asnjë avion
Aktiviteti është pezulluar në Rinas dhe pritet të mos ketë asnjë ulje-ngritje avionësh pasi s’ka punonjës në kulla për të kontrolluar. Madje edhe tek mbikalimet nuk do të ketë punonjës për të njoftuar nëse është qielli i lirë për avionët apo jo.
Greva nisi pasi punonjësit patën firmosur deklaratën e paaftësisë së përkohshme për shkak të stresit të vazhdueshëm që kanë në punë, ndikuar edhe nga pandemia. Por, pesë punonjës u pushuan nga puna për këtë akt.
Një punonjëse e ‘AlbControl’ u shpreh se të gjithë kontrollorët janë të bashkuar dhe të vendosur që t’i shkojnë kësaj çështje deri në fund. ©Lapsi.al
