Partia Demokratike i është përgjigjur akuzave të kryeministrit Edi Rama se me anë të takimeve elektorale po grumbullon shumë njerëz dhe po vepron në shkelje të rregullave anti COVID. Në reagimin e PD-së, humbja e zgjedhjeve e ka bërë nervoz Ramën dhe për këtë ai sulmon takimet tona elektorale. Ndër të tjera selia blu thekson se Rama shqetësohet çdo ditë për mikpritjen që shqiptarët tregojnë ndaj Lulzim Bashës.
“I kapur mat në panikun e humbjes, Edi Rama shqetësohet çdo ditë për mikpritjen e shqiptarëve për Lulzim Bashën. Edi Rama e ka kuptuar që shqiptarët duan ndryshimin dhe askush nuk e ndal dot më këtë. Humbja e zgjedhjeve e ka bërë nervoz dhe për këtë ai sulmon takimet tona elektorale" thuhet në reagimin e PD-së.
Më herët, kryeministri Edi Rama ka bërë thirrje kreut të Partisë Demokratike Lulzim Basha, të ndalë grumbullimet. Me anë të një statusi në profilin e tij zyrtar, Rama ka ndarë foto nga takimet e Bashës në rrethe, duke shkruar një shprehje latine “Të gabosh është njerëzore, të këmbëngulësh në gabim është djallëzore”.
