Kompania AstraZeneca thotë se nga analiza e të dhënave nuk ka gjetur prova se vaksina e saj kundër koronavirusit shkakton mpiksje gjaku. Këto përfundime dolën ndërsa Irlanda dhe Hollanda iu bashkuan një liste në rritje vendesh që po pezullojnë përdorimin e kësaj vaksine.
"Një rishikim i kujdesshëm i të gjitha të dhënave të sigurisë nuk ka nxjerrë prova të një rreziku në rritje të embolizmit pulmonar, trombozës së thellë të venave ose trombocitopenisë, në asnjë grupmoshë, gjini, grupim apo vend të veçantë," tha kompania të dielën.
Rezultatet e analizës, që përfshiu mbi 17 milion njerëz të cilët kishin marrë vaksinën në Britani dhe Bashkimin Evropian, dolën ndërsa Irlanda dhe Hollanda u bashkuan me Danimarkën, Norvegjinë dhe Islandën duke pezulluar përdorimin e vaksinës për shkak të problemeve me mpiksjene e gjakut. Austria ndaloi së përdoruri vaksinën javën e kaluar ndërsa po heton një vdekje të shkaktuar nga mpiksja e gjakut. Dr. Ronan Glynn, zëvendës zyrtari më i lartë mjekësor i Irlandës, tha të dielën se megjithëse nuk kishte asnjë lidhje përfundimtare midis vaksinës dhe incidenteve të mpiksjes së gjakut, ai do të rekomandonte pezullimin e përdorimit të saj si masë paraprake. Rekomandimi i tij pasoi njoftimet se në Norvegji kishte pasur katër raste të mpiksjes së gjakut tek të rriturit e vaksinuar me AstraZeneca-n.Përveç vetë kompanisë, Agjencia Evropiane e Barnave dhe Organizata Botërore e Shëndetësisë kanë thënë se nuk ka asnjë tregues që rastet e mpiksjes ishin të lidhura me vaksinën./ VOA
