Kanë qenë fatale 2 javët e para të 2021 në rrugët e vendit pasi 12 persona kanë humbur jetën nga aksidente rrugore. Shpejtësia, parakalimet e gabuara dhe alkooli, mbeten shkaqet kryesore të tyre.
Nga më të rëndat ishte data 3 janar ku ka pasur 4 aksidente të ndryshme dhe kanë humbur jetën 4 qytetarë në Përmet, Lezhë, Vlorë dhe Elbasan. I rëndë ishte bilanci edhe i aksidentit në Rrugën e Kombit, ku u shua familja Avdijaj nga Kosova. Edhe në këtë rast ishte një parakalim i gabuar dhe shpejtësia e lartë që shkaktoi përplasjen mes automjetit të tyre me një kamion.
Më shumë se 40 persona janë lënduar nga përplasjet e makinave. Në ditët e para të këtij viti, aksidente të rënda janë shënuar edhe në kryeqytet. Teksa jemi në ditët e para të vitit 2021, janë rreth 140 aksidente në të gjithë vendin.
Edhe viti që lamë pas shënoi një bilanc lufte sa u përket aksidenteve. Sipas asaj që raporton tvklan.al në 2020 humbën jetën 159 persona, nga më shumë se 6200 aksidente të ndodhura, ndërsa 850 të tjerë mbetën të plagosur.
