Kryetari i PD Lulzim Basha u pyet në emisionin “Opinion” nëse do ta përfshijë Sali Berishën në listat për deputetë, apo nëse do të përfshijë së paku një familjar të tij në këto lista.
Basha i konsideroi këto si përpjekje për ta zhvendosur vëmendjen nga ai, që është kandidati kryesor për kryeministër, te Berisha apo Meta që kanë qenë kundërshtar politik të Edi Ramës.
“Nuk merrem me nderime familjesh, nuk e shoh si detyrën time. Me stazhin politik që kam nuk e shoh të përshtatshme. Pa diskutim që një nga spin-et e strategjisë së Edi Ramës është të zhvendosë vëmendjen nga unë tek dy nga njerëzit që ka pasur edhe betejat e tij politike, Presidentin aktual të Republikës edhe zotin Berisha.
Edi Rama është mjeshtër i një shahu politik, që banalizoi fushatën e 2017-ën në dy fjalë ‘tepsi’ dhe ‘timon’. Këtu shkëlqen, por ka një dështim katastrofal mbi ekonominë, uljen e taksave për 97 për qind të shqiptarëve ku i ka?!”, - tha Basha.
Kreu i PD-së tha se e ka vendosur se ku do të kandidojë, por nuk mund ta bëjë që tani publike pa ua komunikuar bashkëpunëtorëve të tij. ©LAPSI.al
