Dy trafikantë klandestinësh nga Tirana janë arrestuar në Gjirokastër. M. Xh., 25 vjeç dhe I. B., 30 vjeç, u kapën duke transportuar me automjet 2 klandestinë drej Tiranës kundrejt fitimit.
Arrestimi u krye në fshatin Vanistër teksa iu sekuestrua edhe automjeti bashkë me 3 celularë.
Policia jep detaje
Goditet një tjetër rast i tentativës për dhënie ndihmë për kalim të paligjshëm të kufirit, shtetasve që vijnë nga vendet e treta.
U kapën duke transportuar 2 emigrantë të paligjshëm kundrejt fitimit, bien në pranga 2 shtetas.
Sekuestrohet një automjet dhe tre aparate celularë.
Specialistët e Seksionit për Hetimin e Trafiqeve në DVP Gjirokastër, në bashkëpunim me Policinë Kufitare dhe shërbimet e FRONTEX-it, në bazë të informacioneve të siguruara në rrugë operative, arrestuan në flagrancë shtetasit M. Xh., 25 vjeç dhe I. B., 30 vjeç, banues në Tiranë.
Arrestimi i këtyre shtetasve u bë pasi, në fshatin Vanistër, u kapën duke transportuar me automjetin tip “Mercedez Benz”, 2 emigrantë të paligjshëm, në drejtim të Tiranës, kundrejt fitimit.
Në cilësinë e provës materiale u sekuestrua një automjet dhe tre aparate celularë.
Materialet i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
