Kur u prezantuan për herë të parë këngët e edicionit të 59 të Festivalit të Këngës, ishin 26 artistë pjesëmarrës, ndërkohë që nëpër njoftimet e faqes zyrtare, Radio Televizioni Shqiptar shkruan “25 artistët konkurrentë”. Përpos kësaj, kënga e Manjola Nallbanit, “Ora e jetës”, është fshirë nga kanali i RTSH-së në YouTube.
E kontaktuar nga Anabel.al, këngëtarja pranoi tërheqjen nga gara dhe shtoi se motivet kanë qenë shëndetësore. “Unë jam tërhequr nga Festivali, sepse gjatë kohës që bëheshin prova dhe përgatitje nga konkurrentët e tjerë, unë kam qenë me Covid. Përveç kësaj, sepse tani jam më mirë, por kryesorja [e tërheqjes nga gara është] që Festivali do të mbahet jashtë në shesh dhe unë nuk mund të rrezikoj shëndetin përsëri në një kohë që jam duke u rikuperuar dhe duhet të kem kujdes.”
