Partia Demokratike, ka reaguar nëpërmjet ish-deputetes, Albana Vokshi në lidhje me ndalimin që Policia e Shtetit u ka bërë drejtuesve të Aleancës për Mbrojtjen e Teatrit. Sipas Vokshit aktivistët janë dhunuar dhe u janë fshirë pamjet nga celulari i tyre.
"Ky akt i shëmtuar dhe i rëndë për aktivistë të shoqërisë civile që për muaj dhe vite me radhë kanë demonstruar forcën e një proteste paqësore siç ishte ajo për mbrojtjen e teatrit është dëshmi e qartë se segmentet politike në policinë e shtetit janë aktive dhe në dispozicion të terrorit që përpiqet të mbjellë ne opinion kryeministri Rama. Është e qartë që as dorëheqja e Lleshajt nuk ka ndikuar në përdorimin e policise si vegël qorre e tekave të kryeministrit i cili jo më larg se dje edhe një herë shprehu mbështetjen për drejtorin e përgjithshëm të policisë dhe ato struktura që manipuluan vrasjen e të riut Rasha dhe dhunuan për ditë me radhë të rinjtë protestues në kryeqytet", shkruan Vokshi.
