Ilir Zelka është shqiptari i ekzekutuar në një restorant në Brazil. Ai u largua nga Shqipëria që me 20 nëntor dhe prej asaj kohe jetonte në një hotel të shtrenjtë në Sao Paulo. Zelka rezulton të ketë regjistruar një biznes në Çeki. Kompania mban ende mbiemrin e tij edhe pse më 9 mars 2019 ai ka hequr dorë si ortak.
Policia braziliane ka nisur hetimet për ngjarjen dhe po kërkon kamerat e sigurisë të zonës me qëllim që të identifikojë dhe arrestojë motoçiklistin që qëlloi 47-vjeçarin shqiptar teksa po hante mëngjes në një restorant në Jardins.
Dëshmitarët i thanë policisë se një motoçiklist, i cili ishte veshur me një këmishë të kuqe që mbante një kokore rozë shkoi në vendin e ngjarjes, qëlloi disa herë nga jashtë dhe u largua. Shënjestra ishte e qartë pasi asnjë person i rastësishëm nuk u lëndua.
Krimi ndodhi rreth orës 11:10 të mëngjesit. Fakti që krimineli nuk ka vjedhur asgjë i bën hetuesit të besojnë se nuk kishte të bënte me grabitje, por vrasje me dashje. Sipas policisë, motori i përdorur për krimin ishte një Honda i zi që u gjet më pas i braktisur në sheshin Avenida Brasil. ©LAPSI.al
