Mediat malazeze kanë dhënë detaje të reja për kamionin me mbi 2 tonë kanabis të kapur nga policia dhe doganat e tyre ditën e sotme në pikën doganore të Hanit të Hotit. Gazeta “Vijesti” shkruan se është arrestuar një 40-vjeçar shqiptar i identifikuar si Elvis Calik ndërsa një tjetër person është ndaluar si i dyshuar i lidhur me këtë rast. Sipas të njëjtave burime droga u kap në terminalin doganor në një aksion të përbashkët të Drejtorisë së Policisë dhe administratës doganore dhe se sipas autoriteteve kishte disa muaj që po hetohej për këtë linjë të trafikut.
“Sot, u krye një veprim i përbashkët i Administratës së Policisë dhe Administratës Doganore, i kryer për një periudhë disa mujore, që synonte ndërprerjen e rrugës ndërkombëtare të kontrabandës së drogës nga Shqipëria përmes territorit të Malit të Zi për në vendet e Evropës Perëndimore”, - thuhet në një deklaratë të autoriteteve malazeze.
Sipas të njëjtave burime kamioni i ngarkuar me fruta i drejtuar 40-vjeçari shqiptar kishte hyrë nga Shqipëria dhe ishte transit në Malin e Zi pasi kishte destinacion vende të Europës Perëndimore. Oficerët e policisë zbuluan 9 paleta të mbushur me marijuanë me një peshë totale prej rreth 2 tonë.
Në deklaratën e autoriteteve malazeze thuhet gjithashtu se nga të dhënat operacionale bëhet fjalë për një grup të organizuar kriminal aktiv në territorin e Republikës së Shqipërisë që ka provuar të kontrabandojë rreth 2 tonë marijuanë në Evropën Perëndimore. Për ngjarjen reagoi edhe policia shqiptare që tha se kamioni kishte hyrë në vendin tonë nga Greqia dhe se nuk dihet ku u ngarkua marijuana. ©LAPSI.al
