Ministri i Brendshëm Sandër Lleshaj është justifikuar për fjalët fyese në drejtim të uniformave të policisë kur iu drejtua deputetit Myslim Murrizi me fjalët: “Polic ke qenë e polic do mbetesh”. Kjo deklaratë shkaktoi mjaft reagime në rrjetet sociale pasi u konsideruara aspak etike që vetë ministri i brendshëm të përdorë fjalën “polic” në kuptim pezhorativ. Në një postim të gjatë në Facebook, Lleshaj justifikohet se fjalët e tij janë keqkuptuar edhe pse në fillim kërkon ndjesë për atë që ka thënë.
“I ndodhur përballë një ndërprerje të padenjë të fjalës time dhe agresionit verbal nga deputeti Murrizi, i kam kujtuar atij se ka qenë polic në Policinë famëkeqe Financiare të viteve 90-të, pikërisht për t’i thënë se ai nuk e ka të drejtën morale të përbaltë Policinë e Shtetit, e cila gëzon sot vlerësimin më të lartë të qytetarëve dhe të partnerëve” – thotë Lleshaj. Nëse sheh videon më poshtë Lleshaj nuk e përmend fare policinë financiare të viteve 90. ©LAPSI.al
