https://youtu.be/dxnYjPlGMwU
Në të dy televizionet Ora dhe Ora Neës puna e gazetarëve sot nuk nisi si zakonisht. Ndërsa bënin mbledhjen si çdo mëngjes, në redaksi është shfaqur pronari, Ylli Ndroqi. Nga pas e ndiqte një kameraman që filmonte çdo lëvizje.
Të gjithë gazetarët, operatorët, teknikët dhe administrata ishte paraqitur në punë për të vijuar detyrën e përditshme, për të raportuar ngjarjet, problematikat dhe denoncuar skandalet. Por ndërsa një ditë më parë forcat speciale me armë në duar qëndronin jashtë, pronari Ylli Ndroqi hyri brenda ne redaksi për t'i dhënë mesazhe kurajoje.
"Me qetësi se çdo gjë do të shkojë në vendin e duhur, po nuk patëm furtuna të tilla normalisht nuk do të ekzistojmë më dhe nuk do të bënim punën që kemi marrë përsipër ta bëjmë. Për gati 13 vite une nuk di të jem bërë palë me të majtën a të djathtën. Ka pasur problem edhe në kohën e PD-së, në kohën e PS-së, në kohën kur Rama ka qenë kryebashkiak, në kohën e Bashës, por edhe me Erion Veliajt. Por më interesanti dhe njeriu që nuk përballet dot me të vërtetën është Erion Veliaj dhe ky është sulm politik" ishin fjalët e Ndroqit, në ngarkim të të cilit janë akuza të rënda si ajo për trafik ndërkombëtar droge.
Për gazetarët e dy televizioneve këto nuk kanë qenë ditë të të qeta. Në njërën anë SPAK ka konkluduar se televizionet ku ata punojnë janë ngritur me paratë e drogës, në anën tjetër politika që tenton t'i intimidojë, policia i vendos nën rrethim me armë dhe si të mos mjaftonin këto, me pasuritë e sekuestruara të pronarit, situata financiare bëhet e vështirë për t'u parashikuar.
