Drejtuesja e Misionit të Vëzhguesve të OSBE/ODIHR, Audry Glover, ka mbërritur në selinë e Partisë Demokratike për të zhvilluar një takim me kryedemokratin Lulzim Basha.
Një ditë më parë, Basha pati një takim me të ngarkuarën me punë në Ambasadën e Shteteve të Bashkuara të Amerikës në Tiranë, Leyla Moses-Ones dhe kreu e delegacionit të Bashkimit Evropian, Luigi Soreca-n. Glover, në fillim të javës takoi kryeministrin Edi Rama dhe kreun e grupit parlamentar të Partisë Socialiste, Taulant Balla.
Këto takime mbahen teksa na ndajnë vetëm pak ditë nga zgjedhjet vendore të parashikuara për t’u mbajtur më datë 30 qershor. Nga njëra anë, mazhoranca ka shprehur vendosmërinë për të vijuar me zhvillimin e zgjedhjeve, përkundër vendimit të presidentit të Republikës, Ilir Meta, për çdekretimin e 30 qershorit si datë të paracaktuar për lokalet. Ndërsa, në anën tjetër, opozita e bashkuar joparlamentare ka bërë të ditur se do të vijojë me aksionin opozitar, duke kërkuar largimin e kryeministrit Edi Rama, krijimin e një qeverie tranzitore dhe mbajtjen e zgjedhjeve të lira dhe të ndershme.
Ndërkohë, dy ditë më parë Kolegji Zgjedhor në unanimitet vendosi të rrëzonte kërkesën e Partisë Uniteti Kombëtar për t’u çregjistruar nga gara elektorale, duke lënë në fuqi 30 qershorin si datë për mbajtjen e zgjedhjeve vendore.
