Gazetari gjerman i tabloidit “Bild”, Peter Tiede, ka reaguar sërish përmes një postimi në llogarinë e tij personale në rrjetin social “Facebook”, lidhur me situatën kritike politike në Shqipëri. Tiede shkruan se me arrestimin e urdhëruar të udhëheqësve të opozitës nga socialistët, vendi është nën sundimin e ligjeve të Putinit dhe të Erdoganit.
“Shqipëria tani nën sundimin e ligjeve të Putinin dhe Erdoganit: arrestimi i udhëheqësve të opozitës u urdhërua nga socialistët. Ajo vjen pas trazirave dhe sulmeve në të gjithë mediat. Të plagosur në të dy anët. Jo mirë.”, shkruan Tiede.
Pas publikimit të 16 audio-përgjimeve mbi dosjen 184, kreu i qeverisë paralajmëroi se do ta padiste gazetarin në një gjykatë gjermane, me arsyetimin e drejtësisë së munguar. Megjithatë, gazetari ka paralajmëruar se nesër do të publikohen përgjime të reja, që dëshmojnë përfshirjen e zyrtarëve socialistë në fenomenin e shit-blerjes së votave, të intimidimit të votuesve dhe të shfrytëzimit të punonjësve të administratës publike.
