Miku i Islam Myrtajt, ka dëshmuar në polici të vërtetën e vrasjes së Haxhi Bacinofskit në zonën e "Liqenit Artificial" ditën e djeshme. Ai ka treguar se nuk e dinte që miku i tij kishte armë me vete.
“Islam Myrtajn e kam shok dhe komshi. Të shtunën pasdite më mori në telefon dhe më pyeti ku je. I thashë po dal nga liqeni dhe ai erdhi e më shoqëroi. Ishim duke ecur të dy kur përballë pamë Haxhi Baxhinofskin me te birin. Islami më tha “boo kush duron këtë, do më kujtojë lekët”.
Kur Haxhiu u afrua e ofendoi Islamin rëndë dhe e goditi. U përleshën të 2 dhe pastaj Islami nxori pistoletën dhe qëlloi 4 ose 5 herë. Sapo qëlloi, Islami u drejtua drejt kodrës. Ndodhi shumë shpejt. Unë nuk kisha dijeni që Islami kishte armë dhe që do e vriste. U tremba shumë dhe shkova direkt në shtëpi. Sot u qetësova dhe mora kontakt me policinë”, tha ai.
Policia ndërkohë vijon punën për kapjen e atentatorit, i cili i largua mbrëmë nga vendngjarja, pasi qëlloi 5 herë në drejtim të 62-vjeçarit duke e lënë të vdekur në vend.
