Dajë e nip nga Shkodra rezultojnë të zhdukur prej 6 ditësh. Kanë qenë bashkëshortet e Agron Mollës, 47 vjeç, banor i fshatit Dobraç të Shkodrës dhe e Gëzim Hysajt, 56 vjeç banor i fshatit Myselim në Postrribë të Shkodrës që kanë bërë denoncimin në polici.
Dajë e nip rezultojnë të zhdukur prej mbrëmjes së 23 gushtit, ndërsa denoncimi për ta në polici është bërë më 24 gusht.
Bashkëshortja e Gëzim Hysajt i kërkon policisë dhe medias ta ndihmojnë për të gjetur bashkëshortin e saj, të cilin nuk e ka parë që prej orës 20:20 të së enjtes së 23 gushtit
" Në orën 20:20 burri im doli nga shtëpia për të takuar një shok në qytet. Që prej asaj dite nuk kemi asnjë të dhënë tjetër. Nga sa kam kontaktuar me familjen e nipit të tij, ky i fundit ka dalë nga shtëpia në orën 21:30 pasi e kishte kërkuar dikush. Më pas asgjë," tregon bashkëshortja Saimira Hysaj.
Agron Molla ka dalë nga banesa në orën 21:30 pikërisht në momentin kur telefoni i dajës është mbyllur.
"Atë ditë deri në orën 21:30 telefoni i bashkëshortit ka qenë i hapur dhe më pas është mbyllur. Nuk dimë të ketë pasur konflikte. Shkonte në Shkodër të punonte si çdo njeri tjetër" tregon ajo.
Gëzim Hysaj është babai i katër fëmijëve ndërsa Agron Mollaj është babai i tre fëmijëve.
