Kënga që do të përfaqësojë Italinë në ‘Eurovision 2018’, “Non mi avete fatto niente”, është në krye të preferencave të ndjekësve të festivalit evropian. Në faqen ‘Wiwibloggs’, kënga e Ermal Metës dhe Fabrizio Moro ka marrë mbi 25% të votave, një diferencë e madhe me vendin e dytë, Spanjën, që ka gati 18% të votave. Nga 9 shtete që kanë përzgjedhur tashmë këngët e tyre, Eugent Bushpepa që do të përfaqësojë Shqipërinë me “Mall”, renditet në vend të gjashtë me gati 8% të votave në ‘Wiwibloggs’, me një diferencë prej 2% nga vendi i pestë.
Gjithsesi, Eugenti nuk ka publikuar ende versionin përfundimtar të këngës dhe shumë komentues kanë pritshmëri të larta për produktin e përpunuar për ‘Eurovision’. Në këtë renditje, Shqipëria ka lënë pas vetes Britaninë e Madhe, Zvicrën dhe Maltën, ndërkohë që fansat mund të votojnë ende në sondazh.
