Kryeministri Edi Rama zhvilloi sot pasdite një takim me studentë të ekselencës në qytetin e Shkodrës, aty ku ai ka zhvendosur këtë fundjavë mbledhjen e kabinetit qeveritar. Takimi përfundoi me një moment që duket më shumë i stisur nga ‘spin doctorat’ në zyrën e propagandës së Ramës, sesa një rastësi. Po çfarë ndodhi konkretisht? Një studente pjesë e rrjetit të ekselencës zbulon befas se kishte filluar punë në kabinentin e kryeministrit Rama, madje ky i fundit nuk dinte asgjë. Këtë u kujdes ta theksonte vetë studentja, si dhe Kryeministri i cili u shpreh i befasuar që nuk e njihte nëpunësen e re të zyrës së tij.
I vetëdijshëm se ky moment nuk do të ngelej jashtë vëmendjes së medias, Rama i parapriu duke thënë se tani është e sigurt që kazani do të merret me këtë çështje. Dhe ne të Lapsi.al duam ta raportojmë sepse në fakt s’i besojmë dot propagandës së Kryeministrit. Ky moment në takimin e Ramës për Ditën e Rinisë, më shumë ngjan të jetë i inskenuar për të treguar se këtu ka edhe punë edhe meritokraci, sesa thjesht një rastësi. Zor të besohet se Rama nuk i njeh njerëzit e kabinetit të tij, sikundër është vështirë të pranohet se këtu punësimet në shtet bëhen me konkurse apo meritokraci.
Shihni çfarë po ndodh me gjoja konkurset për drejtorët e hipotekave, spitaleve apo institucioneve të tjera. Në të gjitha rastet dalin fitues vetëm socialistët apo njerëzit që kanë lidhje të afërta me njerëz të pushtetit. Sidoqoftë mbase nuk mund të jetë ky rasti tipik edhe për studenten e punësuar së fundi në zyrën e Ramës, por ajo çfarë ka ndodhur dhe po ndodh me administratën publike në vend, s’të le shteg të mendosh ndryshe. ©LAPSI.al
