Kur mendon se lojërat e policëve para kamerave morën fund, Fatmir Xhafaj rikthehet me një video-klip alla Saimir Tahiri për ditë festash. Policëve të shkretë nuk iu mjafton stresi i punës, ecjet e gjata në të ftohtë, orët jashtë orarit, përballja me individë problematikë por tani i detyrojnë të aktrojnë si patriotë me flamuj që ngrihen nëpër komisariate.
Një video-montazh i shpërndarë me rastin e Ditës së Flamurit në rrjetet sociale, tregon një vajzë police që del herët në mëngjes nga komisariati me flamur në duar, për ta ngritur pastaj solemnisht në shtizë.
Video-klipe si këto i solli për herë të parë në punën e policisë Saimir Tahiri. Ish Ministri i Brendshëm i përdori për të fshehur të vërtetën e hidhur të implikimit të policëve si Jaeld Çela, Gjergj Kohila, Sokol Bode etj në trafikun e drogës.
Të njëjtët policë që Fatmir Xhafaj nuk i arrestoi dot. Tradita vazhdon nga njëri ministër tek tjetri, që zgjidhjen e problemit nuk e shohin tek operacionet kundër krimit, por tek inskenimet patetike të figurantëve veshur me blu.
