Top Channel e ka goditur sërish Edi Ramën që në lajmin e parë. Sot, shkak për reagimin e ashpër të Topit është bërë statusi i djeshëm i kryeministrit, që e konsideronte një media kazani dhe një ekran të pabesueshëm. Më shumë se kaq, strategët e komunikimit të Ramës shpërndanë një lajm sipas të cilit, zemërimi i zonjës Hoxha, pronares së këtij kanali, vjen nga fakti se shefi i qeverisë, i cili ka vendosur të mos e trajtojë pushtetin si tepsi dhe të mos i japë si dhuratë Top Channel vendin e artë të Drejtorit të Postave. Pra nënteksti qe i qartë se Top Channel është një kazan më tepër që i lëviz politikat e tij editoriale sipas interesave të pronares së tij.
Në këtë klimë përplasjeje, Top Channel ka bërë kronikën e pestë në gjashtë ditë, me tone kritike ndaj Ramës (lexo shkrimet dhe analizen poshte). Ai ka kujtuar se në të shkuarën, që nga Gërdeci e deri kur u rrëmbyen votat e Bashkisë së kryeqytetit, ky televizion ka mbështetur qëndrimet e opozitës. Ai ka kujtuar se nga ky ekran janë denoncuar mëkatet më të mëdha të pushtetit të Berishës, duke theksuar me nënkuptim se atëherë Rama nuk e quante kazan.
“Top Channel nuk është një portal. Është televizioni me i besueshëm në vend. Është televizioni që transmetoi me zë dhe me figurë çfarë ndodhi në Gërdec, çfarë ndodhte në qeverinë Berisha, çfarë ndodhi në 21 janar, apo si ndryshoi rezultati i 8 majit për Tiranën, siç ishte po Top Channel që hetoi si paguheshin votuesit të vinin e të votonit në zgjedhjet lokale të 2015, apo siç ishim të parët që sollëm në Shqipëri dosjen hetimore të Katanias për klanin Habilaj.
…sepse lajmi më parë kalon nga ne, Dje, Sot dhe Nesër. Sa për besueshmërinë e Topit, Dje, Sot dhe Nesër, e lëmë më mirë të gjykojnë shqiptarët” thuhej në kronikën e sotme të Topit". ©Lapsi.al
