Lulzim Basha dhe Edi Rama shkëmbyen akuza sot me njëri-tjetrin për gjuhën e përdorur kundër mediave. Basha mori shkas nga fjalimi i Ramës në ditën e lirisë së mediave, duke e quajtur një gjuhë të rrezikshme që nxit dhunën kundër gazetarëve, ndërsa Rama i kujtoi deklaratat e forta nga çadra kur Basha sulmoi televizionet që nuk transmetonin fjalimet e tij në takimet me qytetarët.
“Fjalimi i djeshëm i Edi Ramës kundër gazetarëve është fjalim kriminal. Me fjalime të tilla, ai është duke nxitur për ditë urrejtjen dhe dhunën ndaj gazetarëve. Gazetarët janë ndër njerëzit më të rrezikuar në botë, shënjestër e shpeshtë e krimit dhe e politikanëve të korruptuar. Vetëm pak ditë më parë në Maltë u vra në mënyrë barbare një gazetare që hetonte kryeministrin.
Klima që krijon Edi Rama inkurajon pikërisht kriminelët që të sulmojnë gazetarët që raportojnë dhe hetojnë krimin dhe korrupsionin. Njeriu që ka thurur vetëm lavde dhe përkëdheli për Elvis Roshin, Saimir Tahirin dhe kriminelët e tjerë më të cilët rrethohet, duhet të ndalë menjëherë gjuhën e tij të rrezikshme” shkruajti Basha sot në Facebook.
Në përgjigjen për kreun e PD-së, Rama nuk tërhiqet nga ajo ç’ka thënë për gazetarët, por i kujton Bashës etiketimin se të gjitha mediat janë të kapura nga droga.
“LB ishe ti apo isha unë në Çadër, kur ulërije “të gjitha mediat janë të kapura nga droga përveç një kanali tv”, të cilin i’a rekomandoje publikut si burim të kulluar?! Unë kurrë s’e kam imagjinuar, jo më ta them një veshëgjatllëk të tillë. Eshtë thjesht shpifje!
Prandaj kërkoju falje njëherë të gjitha mediave (përveç njërës) që i kriminalizove me baltën e Çadrës për muaj të tërë, ditë për ditë, pastaj fol sa të duash për rrezikun që u vjen nga fjalët e mia” shkruan Rama.
Kryeministri justifikohet për fjalorin e tij me sharje dhe ofendime për gazetarët kur shkruan se gazetarëve “kurrë nuk u ka hyrë, nuk u hyn e nuk t’u hyjë një gjemb në këmbë”.
“Po mos e harro, vazhdon Rama, unë kam jetuar me ta, kam punuar me ta, kam ngrënë kopaçe kokës e më ka dalë edhe gjak për lirinë e fjalës bashkë me ta. Apo s’e mban mend?! Kështu që nga unë e nga fjalët e mia dje, sot e mot, atyre mund t’u dalë më shumë vrer nga goja kundër meje e qeverisë sime, po kurrë nuk u ka hyrë, nuk u hyn e nuk t’u hyjë një gjemb në këmbë. Kurrë.
Por natyrisht, gojë s’kanë vetëm ata dhe gojën time e kam pasur, e kam dhe do ta kem sa të kem frymë, për të vërtetat e mia që nuk i negocioj e as i kyç në heshtjen hipokrite të medemek respektit për median! Të gjithë jemi të lirë të flasim, njerëzit pastaj janë të lirë t’i gjykojnë të gjithë, edhe mua njësoj si gjithë të tjerët”.
