I pyetur nga Deutche Welle për mundësinë e çeljes së negociatave për Shqipërinë vitin tjetër, komisioneri për zgjerimin, Johanes Hahn thotë se ende qëndron problemi me azilkërkuesit që dëmtojnë reputacionin e vendit.
“Pres që Progres-Raporti për Shqipërinë, që do të dalë në prill të vitit të ardhshëm, të jetë pozitiv. Po ashtu pres raport pozitiv edhe për vendet fqinje, të përfshira në proceset e integrimit: Maqedoninë dhe Malin e Zi. Nuk ka feedback negativ për Shqipërinë prej asnjërit nga vendet anëtare. Por Shqipëria duhet të zgjidhë problemin e azilkërkuesve në vendet e BE, pasi ai dëmton reputacionin e Shqipërisë në opinionin publik të vendeve anëtare. Shqipëria dhe vendet e tjera të Ballkanit Perëndimor janë në rrugën e duhur” u shpreh Hahn.
Komisioneri nuk e përmendi këtë problem në konferencën e përbashkët me Edi Ramën. Çështja e azilkërkuesve, deklaroi Hahn në konferencën në kryeministri është drejt përmirësimit. Ajo ç’ka e pengon Shqipërinë sipas tij ishte mungesa e rezultateve konkrete nga procesi i Vetingut.
