Nuk zgjati shumë paqja e heshtur mes ish-bashkëpunëtorëve të spektakleve të kërcimit. Nga batuta në batutë, të hedhura veçmasi nëpër transmetimet përkatëse, tashmë “lufta” duket se ka zbritur në “fushëbetejë” (mediat sociale), aty ku përplasen rëndom njerëzit në ditët e sotme.
Gjithçka duket se ka nisur dy javë më parë në “Dancing With the Stars” ku prezantuesja e spektaklit të Vizion +, tingëlloi se thumboi programin e Grabockës në Tv Klan. “Këtu VIP-at kërcehejnë vërtëtë, ndryshe nga çfarë ndodh në Tv-të e tjera”, tha Ami e cila shkaktoi reagim tek Alketa e “Dance With Me”, që mbrëmjen e së hënës nuk nuk ia la mangut duke i kthyer indirekt përgjigje: “Ndryshe nga çfarë aludohet, këtu kërcehet vërtetë dhe prova janë Stine dhe Roza Lati”. Si për të përforcuar paralajmërimin për rivalët e tyre që prezantuesja dërgoi nga skena, ndërhyri Albi Nako. Me një shprehje ironizuese, koreografi i “Dance With Me” iu drejtua VIP-ave dhe balerinëve të spektaklit të tij: “Kush thotë se ju nuk kërceni, Ju hëngshin mandarinat”.
Kaq ka mjaftuar që producentja dhe stafi i saj i ngushtë të shpërthejnë sot, jo rastësisht me foto mandarinash. “Mandarina të kalbura”, i janë kundërpërgjigjur njëzëri Holta Dulaku, stilisti i spektaklit Ardi Asllani dhe skenaristi Eraldo Rexho, Alketës Verës dhe Albi Nakos.
