Një konflikt i ndodhur paraditen e së mërkurës në ambientet e një poliklinike në lagjen “Vasil Shanto” në Shkodër u pasua nga një tentativë hakmarrjeje, e cila u parandalua nga Policia.
Sipas autoriteteve, rreth orës 11:30, Arvin Fregjaj, 18 vjeç, dyshohet se ka plagosur me thikë Vildan Kepëcën, 32 vjeç, gjatë një konflikti për motive të dobëta. I plagosuri u transportua në spital dhe ndodhet nën kujdesin e mjekëve.
Ndërkohë, sapo mori vesh për ngjarjen, vëllai i të plagosurit, Arben Kepëca, 41 vjeç, dyshohet se mori një pistoletë me fishek në fole dhe u nis në këmbë me qëllim për të vrarë autorin e dyshuar të plagosjes.
Policia ndërhyri në kohë, duke e arrestuar 41-vjeçarin në flagrancë. Sipas uniformave blu, gjatë ndërhyrjes ai tentoi të largohej dhe hodhi armën e zjarrit që mbante me vete.
Ndërkohë, 18-vjeçari Arvin Fregjaj është shpallur në kërkim, ndërsa grupi hetimor, nën drejtimin e Prokurorisë, po vijon hetimet për zbardhjen e plotë të rrethanave të ngjarjes.
