Java e shtatë e Abissnet Superiore sjell të shtunën dy përballje që premtojnë më shumë sesa tri pikë në lojë. Tirana pret Laçin në Vorë, në një duel ku bardheblutë duhet të tregojnë se mund të ndërtojnë vazhdimësi, ndërsa kurbinasit kërkojnë të konfirmojnë se dinë të jenë të rrezikshëm edhe jashtë fushës së tyre. Më pas, në Korçë, Skënderbeu dhe Elbasani përballen me presionin e rezultateve: vendasit kërkojnë fitoren e parë, ndërsa miqtë duan të mos humbasin kontaktin me zonën e sipërme.
Në kampionat, pikët kanë të njëjtën vlerë në tabelë, por jo gjithmonë të njëjtën peshë në momentin kur fitohen. Dhe të shtunën java e shtatë e Abissnet Superiore vjen me dy përballje ku rezultati mund të ndryshojë jo vetëm renditjen, por edhe klimën rreth skuadrave. Në orën 13:30, Tirana pret Laçin. Një duel që nuk mund të përmblidhet vetëm te emrat e dy klubeve. Bardheblutë kanë nevojë të ndërtojnë vazhdimësi dhe të mos e lënë sezonin të kthehet në një seri rezultatesh të paqëndrueshme. Pas fitores në derbi, Tirana është ngjitur me tetë pikë në vendin e katërt, edhe pse Klafuric nuk dëshiron të mjaftohet me kaq. Përballë është Laçi, me vetëm një pikë më pak dhe një objektiv të qartë: të mos lejojë që diferenca me rivalët të rritet. Për më tepër, ndeshja luhet në stadiumin e Vorës, një detaj që ia heq Tiranës avantazhin tradicional të shtëpisë.
Në Korçë, në orën 16:00, Skënderbeu sfidon Elbasanin në një tjetër histori presioni. Skuadra e Ahmatajt vjen pas gjashtë javësh pa fitore dhe me vetëm tri pikë. Për një skuadër që kërkon të rikthehet mes ekipeve konkurruese, koha për të kthyer paraqitjet në rezultate po shkurtohet. Elbasani, me shtatë pikë, nuk ka luksin të kënaqet vetëm me barazime: një fitore në Korçë do t’i jepte mundësinë të ngjitej në renditje dhe të fitonte besim. Dy ndeshje, dy skenarë, por një emërues i përbashkët: në këtë fazë të kampionatit, pikët e humbura kushtojnë më shumë se justifikimet.
