Ndryshimet hormonale gjatë ciklit menstrual janë lidhur prej kohësh me simptoma si lodhja, ndryshimet e humorit apo dhimbjet e kokës. Por , studiuesit po zbulojnë edhe një efekt më pak të njohur, faktin që hormonet mund të ndikojnë edhe te mënyra si dëgjojmë.
Sipas studimeve të fundit të cituara nga BBC, dëgjimi tek gratë duket se ndryshon gjatë muajit, në varësi të niveleve hormonale. Studiuesit kanë vënë re se përpunimi i tingujve dhe ndjeshmëria ndaj tyre luhatet gjatë fazave të ndryshme të ciklit menstrual, ndërsa pas menopauzës ndryshimet bëhen edhe më të dukshme.
Ndryshe nga burrat, tek të cilët dëgjimi zakonisht përkeqësohet gradualisht me kalimin e viteve, tek gratë janë vërejtur luhatje mujore që lidhen me hormonet, veçanërisht estrogjenin.
Një ekip studiuesish amerikanë analizoi mënyrën se si veshi dhe truri përpunojnë tingujt, duke studiuar aftësinë për të dalluar pauza shumë të shkurtra mes dy tingujve. Rezultatet treguan se gratë me nivele më të larta estrogjeni kishin ndjeshmëri më të madhe ndaj tingujve, sidomos pak para ovulimit.
Kjo do të thotë se dëgjimi mund të jetë më “i mprehtë” në periudha të caktuara të muajit. Edhe pse kërkimet janë ende në fazat e para dhe rezultatet nuk janë publikuar zyrtarisht, studiuesit besojnë se hormonet mund të luajnë një rol më të madh nga sa mendohej deri tani.
Sipas autores kryesore të studimit, studiueses Anhelina Bilokon nga Universiteti i Maryland College Park, kjo fushë është studiuar pak sepse kërkon kohë dhe është më komplekse për t’u analizuar. Megjithatë, ajo shpreson që kërkimet e ardhshme të ndihmojnë në personalizimin e trajtimeve për problemet e dëgjimit tek gratë.
Zbulimi i lidhjes mes hormoneve dhe dëgjimit mund të hapë rrugën për mënyra të reja diagnostikimi dhe trajtimi, duke treguar edhe një herë se sa shumë ndikim kanë hormonet në trupin dhe funksionet tona të përditshme. /anabel
