Një hetim i prokurorisë së Nanterres ka nxjerrë në dritë një organizatë kriminale që kishte vënë në shënjestër sipërmarrës dhe persona të njohur për pasurinë e tyre. Në krye të saj nuk ishte një kriminel me përvojë, por në mënyrë të pabesueshme një djalë vetëm 18-vjeçar: Clément L. I ndaluar tashmë në burgun e Villepinte për vepra të rënda, ai vazhdonte të jepte urdhra nga qelia përmes smartphone-it dhe aplikacionit Snapchat, duke u tallur me kontrollet e sigurisë. Mes emrave të pranishëm në pajisjet e tij ishte edhe ai i Kylian Mbappé, objektiv i ndjeshëm ndaj të cilit po planifikohej edhe një rrëmbim për qëllime zhvatjeje.
Edhe Mbappé mes emrave të VIP-ave, në listën e bosit të mitur
Një histori që i afrohet të pabesueshmes dhe që njëkohësisht nxjerr në pah aftësitë e padiskutueshme hetimore të xhandarmërisë franceze, por edhe boshllëqet e mëdha në sistemin penitenciar. Hetuesit gjetën dy telefona në qelinë e të riut kriminal dhe brenda tyre gjetën 26 adresa të viktimave të mundshme. Krahas sipërmarrësve, argjendarëve dhe një grosisti turk të mishit, shfaqej edhe futbollisti francez i Real Madrid.
Sipas burimeve gjyqësore, Mbappé konsiderohej një objektiv veçanërisht interesant për pasurinë e tij, përveçse për famën e tij. Projekti, ende në fazën fillestare, parashikonte jo vetëm një tentativë të mundshme vjedhjeje, por edhe një rrëmbim për qëllime zhvatjeje, që do të realizohej gjatë një prej vizitave të tij në Paris. Në fund, fatmirësisht, asgjë nuk u krye, duke lënë vetëm në letër qëllimet kriminale. Në të njëjtën listë të kriminelit të mitur figuronin edhe një reper francez dhe biznesmenë të tjerë me pasuri të mëdha: të gjithë objektiva të përzgjedhur për profilin e tyre të lartë ekonomik, edhe pse shumë prej planeve nuk u realizuan kurrë.
Si nisi hetimi që çoi në shkatërrimin e bandës
Hetimi nisi në prill nga një vjedhje e thjeshtë ndaj një orëndreqësi në Neuilly-sur-Seine, të cilit iu vodhën sende me vlerë mbi 150 mijë euro. Përmes gjurmëve të gishtërinjve dhe makinës së përdorur për arratisjen, policia arriti te një bashkëpunëtor dhe më pas te urdhëruesi. Një djalë, Clément L., 18-vjeçari franko-zviceran, i njohur edhe me pseudonimin “Lester Z”, i cili drejtonte operacionet nga burgu i Villepinte, duke shfrytëzuar boshllëqet e dukshme në sistemin e kontrollit. Hetuesit i lidhën me të disa vjedhje në banesa dhe plane rrëmbimi të kryera ose të përgatitura mes prillit dhe gushtit dhe më 21 gusht ai u dërgua për gjykim në Nanterre për vjedhje në grup të organizuar. Gjatë marrjeve në pyetje ai u përpoq të minimizonte rolin e tij, duke u paraqitur si një ndërmjetës i thjeshtë, por në fund u dorëzua, në lot, gjatë marrjes në pyetje.
Operacioni ndërpreu kështu përgatitjet për krime të reja nga banda e drejtuar nga bosi i mitur, në një histori thuajse si skenar hollivudian dhe që, vetëm falë një serie rastësish dhe hetimeve të pandërprera, nuk çoi në asnjë dëm ndaj Mbappé. Në fund, ylli francez nuk kishte dijeni për asgjë dhe nuk ka qenë kurrë në një rrezik konkret.
