Një tjetër hap është ndërmarrë për përmbylljen e proceseve të legalizimit dhe trajtimin e të drejtave të pronarëve të pasurive të prekura nga këto ndërtime. Këshilli i Ministrave ka miratuar vendimin për kompensimin financiar të pronarëve të pasurive të paluajtshme, sipërfaqet e të cilave janë zënë nga ndërtime të legalizuara. Vendimi synon të garantojë trajtimin e ish-pronarëve, duke vijuar paralelisht procesin e pajisjes së banorëve me parcelat ndërtimore.
Agjencia Shtetwrore e Kadastrws njofton se nw kuadwr tw kwtij vendimi, 1901 banorë përfitojnë mundësinë për t’u pajisur me parcelën ndërtimore. Ndërkohë, 328 prona do të trajtohen për kompensim financiar, ndërsa fondi i akorduar për këtë qëllim arrin në 840,702,155.51 lekë. Në procesin e kompensimit përfshihet një sipërfaqe totale prej 61,477.13 metrash katrorë truall.
Pas publikimit të vendimit në Fletoren Zyrtare, lista e përfituesve do të bëhet publike edhe në platformën online “Përfituesit e parcelës ndërtimore & Subjektet që kompensohen”, në faqen zyrtare të ASHK-së. Kjo platformë u mundëson qytetarëve të verifikojnë nëse janë pjesë e listës së përfituesve, si për pajisjen me parcelë ndërtimore, ashtu edhe për trajtimin për kompensim financiar. Vendimi është pjesë e procesit të vijueshëm për zgjidhjen e problematikave të krijuara nga ndërtimet pa leje dhe legalizimet, duke synuar krijimin e një ekuilibri mes të drejtave të poseduesve të objekteve të legalizuara dhe të drejtave të pronarëve të truallit.
Kompensimi financiar i pronarëve të prekur nga legalizimet është parashikuar edhe në vendime të mëparshme të Këshillit të Ministrave. Në qershor 2026, për shembull, u miratua një tjetër vendim për këtë kategori, me një fond prej rreth 870.7 milionë lekësh dhe 422 prona të trajtuara për kompensim. Me vendimin e ri, procesi vijon me një tjetër paketë pronash dhe përfituesish, duke synuar përmbylljen graduale të proceseve kalimtare të pronësisë dhe forcimin e sigurisë juridike mbi pronën.
