Të paktën 10 persona kanë humbur jetën dhe dhjetëra të tjerë janë plagosur pas një sulm me dronë dhe raketa që forcat ruse ndërmorën gjatë natës ndaj kryeqytetit ukrainas, Kiev. Sulmet goditën disa lagje të qytetit, duke shkaktuar dëme në ndërtesa banimi dhe infrastrukturë. Mes viktimave dhe të plagosurve raportohet se ka edhe fëmijë. Në disa zona shpërthyen zjarre.
Kreu i administratës ushtarake të Kievit, Tymur Tkachenko, akuzoi Rusinë se po godet qëllimisht zonat e banuara dhe po vë në shënjestër civilët. Sulmi ndodhi vetëm pak orë pasi presidenti ukrainas Volodymyr Zelensky paralajmëroi se Rusia po përgatiste një ofensivë ajrore.
Nga ana e saj, Ministria ruse e Mbrojtjes deklaroi se objektiv i operacionit ishin objektet e infrastrukturës energjetike të Ukrainës dhe se sulmet ishin përgjigje ndaj veprimeve të fundit ushtarake ukrainase në territorin rus.
