Gati 300 persona u mblodhën në Paris të dielën për të kërkuar që një shqiptar aktivist antifashist të mos ekstradohet në Gjermani. Rexhino Abazaj i njohur si “Gino” kërkohet nga autoritete gjermane për përfshirje në një rast dhune kundër një parade të neonazistëve në Hungari.
Abazaj është një aktivist shqiptar "antifa", por ekstradimi i tij në Gjermani u urdhërua nga gjykatat franceze në mesin e gushtit. Më herët gjykatat franceze kishin refuzuar ta dorëzonin atë në Hungari me arsyetimin e rrezikut të të drejtave të tij themelore.
Shqiptari në 30-at, i cili e ka apeluar vendimin, akuzohet nga Hungaria për dhunë kundër neonazistëve që marshuan në Budapest në shkurt të vitit 2023, të cilët u sulmuan me shkopinj gome dhe çekiçë. Ai përballet me një dënim deri në 24 vjet burg në Hungari dhe deri në 10 vjet në Gjermani, pasi disa nga viktimat e supozuar të dhunuar janë shtetas gjermanë.
"Unë jam viktimë e persekutimit politik", si pjesë e një lëvizjeje për të "ndjekur antifashizmin në të gjithë Evropën", - tha "Gino" për AFP në një tubim në verilindje të Parisit të thirrur nga një komitet mbështetës.
Aktivisti që kërcënohet me ekstradim e përshkroi si “stresuese" pritjen për seancën e apelit, gjatë së cilës ai synon të "mbrojë argumentet e tij".
Në prill të vitit 2025, Franca refuzoi ta dorëzonte atë në Budapest, duke përmendur "rreziqet" e "trajtimit çnjerëzor" në burg dhe pasigurinë në lidhje me garantimin e një gjykimi të drejtë në atë vend të Bashkimit Evropian.
"Gjykata e Kasacionit do të jetë apeli i fundit i mundshëm. Ekziston një rrezik real që Gino të transferohet më pas në Hungari nëse ai ekstradohet më parë në Gjermani. Ata e bënë këtë edhe me Majën. Gjermania e dorëzoi atë", - shpjegoi për AFP-në një zëdhënës i Komitetit të Solidaritetit të Budapestit.
Në shkurt, drejtësia hungareze dënoi Maja T., një aktiviste të dorëzuar në Budapest nga Gjermania, me 8 vjet burg për të njëjtën rast dhune kundër neonazistëve.
Përpara një banderole të zezë ku shkruhej "Solidaritet me Ginon, jo ekstradimeve" , disa organizata dhe zyrtarë dolën kundër ekstradimit. E pranishme ishte edhe deputetja e LFI-së, Danièle Obono, e cila dëshmoi për mbështetjen e partisë së saj për "të gjithë aktivistët antifashistë që janë viktima të represionit nga shtetet e tyre".
Në fund të shtatorit 2025, Hungaria ndoqi shembullin amerikan duke e klasifikuar lëvizjen "antifa" si një organizatë "terroriste". ©LAPSI.al
