Futbolli spanjoll është në zi për vdekjen e Jesus de Miguel, pas një përplasjeje në fushë me Jesus Owono gjatë ndeshjes së Segunda Division mes Tenerifes dhe Andorrës, e cila u shndërrua në një tragjedi. Për portierin nga Guinea Ekuatoriale, i cili ndodhet ende në gjendje shoku pasi shkaktoi vdekjen e kundërshtarit me një dalje të rrezikshme, është hapur një hetim që do të duhet të përcaktojë përgjegjësinë dhe të vendosë pasojat e veprimit të tij. Videot e regjistruara nga disa tifozë të pranishëm në stadium dhe rrëfimet e mediave spanjolle bëjnë të mundur rindërtimin e minutave përpara përplasjes që i kushtoi jetën futbollistit spanjoll.
Në minutën e 99’ të ndeshjes, në fund të një kohe shtesë shumë të gjatë, Owono goditi de Miguel me gjurin e ngritur. Ky i fundit pësoi një arrest kardiorespirator që zgjati disa minuta. Ai u reanimua në fushë dhe më pas u transportua me urgjencë në spital, por shtrimi në repartin e terapisë intensive nuk arriti t’i shpëtonte jetën. Përplasja e dhunshme ndodhi pasi portieri kishte dalë deri në lartësinë e vijës së mesit të fushës për të ndërprerë topin. Ajo erdhi në kulmin e një ndeshjeje që ishte bërë gjithnjë e më e tensionuar për shkak të rikuperimit të Andorrës, e cila arriti të barazonte pasi kishte qenë në disavantazh 2-0.
Aquí tenéis las imágenes previas a la acción del portero Owono, en las partes que no lo enfocan, en una de ellas está encarándose y diciéndole cosas al portero rival, y en la otra, celebrando el gol en la cara a la grada del Tenerife. Es reincidente en este tipo de actitudes. https://t.co/bphUEmLZaB
— Eldense (@Eldense_) November 3, 2026
Çfarë ndodhi përpara ndërhyrjes së Owono?
Policia spanjolle ka hapur një hetim për portierin, i cili, përveç një pezullimi shumë të gjatë, mund të përballet edhe me pasoja në aspektin penal për vdekjen e De Miguel. Tifozët e pranishëm në stadium kanë publikuar disa pamje të regjistruara përpara përplasjes fatale. Pjesa e fundit e ndeshjes ishte bërë shumë nervoze, pasi golat e barazimit të Andorrës u shënuan brenda një harku kohor prej dy minutash. Pamjet tregojnë një Owono shumë të irrituar, i cili fillimisht u përplas me portierin kundërshtar në anën tjetër të fushës dhe më pas festoi golin, duke u gëzuar drejtpërdrejt përpara tribunës së tifozëve të Tenerifes.
Për disa prej spektatorëve, nuk bëhet fjalë thjesht për një ndërhyrje të pamatur, por për një gjest të dhunshëm ndaj sulmuesit që po vraponte drejt portës. Në përpjekje për ta ndalur, portieri u hodh me forcë drejt tij, duke e goditur në kraharor dhe në kokë. Një goditje fatale, e cila më pas çoi në vdekjen e De Miguel mëngjesin e ditës pasardhëse, pas shtrimit urgjent në repartin e terapisë intensive.
Owono nuk e kishte kuptuar menjëherë seriozitetin e situatës, pavarësisht se tifozët në tribunë vazhdonin t’i bërtisnin “vrasës”. Fillimisht, për tifozët, ai nuk dukej i penduar për veprimin e tij, por mediat kanë theksuar se ndodhet në gjendje shoku. Pas shtrimit të futbollistit në spital, ai qëndroi në dhomat e zhveshjes duke u lutur dhe duke qarë. Gjithashtu, u përpoq të kontaktonte me familjen e lojtarit për t’u kërkuar falje privatisht.
