Aktivistët dhe qytetarët do të protestojnë sot në orën 10:00 para Gjykatës Penale në Tiranë. Ata kërkojnë lirimin e 14 protestuesve të arrestuar pas tensioneve të dy ditëve më parë para Kryeministrisë. Tubimi do të zhvillohet në të njëjtën kohë kur të arrestuarit pritet të dalin para gjykatës për caktimin e masave të sigurisë. Aktivistët u kanë bërë thirrje qytetarëve dhe studentëve t’i bashkohen protestës.
Aktivistët paralajmëruan se arrestimet nuk do ta ndalin mobilizimin dhe se protesta do të vijojë deri në largimin e Edi Ramës dhe qeverisë së tij.
Aktivistja Sidorela Vatnikaj kërkoi lirimin e 14 të arrestuarve, të cilët, sipas saj, po mbahen padrejtësisht. Ajo akuzoi qeverinë se po përdor Policinë e Shtetit për të frikësuar dhe zmbrapsur qytetarët që protestojnë.
“Intimidimi i tyre nuk na frikëson, por na shton revoltën dhe qëndresën”, deklaroi Vatnikaj, ndërsa përsëriti thirrjen për dorëheqjen e kryeministrit.
Aktivistët kanë paralajmëruar gjithashtu se do të protestojnë para Kuvendit në çdo seancë parlamentare.
