Kritikët e filmit të BBC, Caryn James dhe Nicholas Barber, kanë përzgjedhur filmat që i konsiderojnë si më të spikaturit e vitit. Lista përfshin gjithçka, nga blockbuster-i epik i Christopher Nolan, te komeditë absurde dhe dramat me histori të forta njerëzore.
1. “The Invite”
Një komedi amerikane e rrallë, e krijuar për një publik të rritur. Filmi zhvillohet pothuajse tërësisht në një apartament, gjatë një mbrëmjeje, dhe ndjek dy çifte me dinamika krejt të ndryshme.
Seth Rogen dhe Olivia Wilde interpretojnë një çift të martuar që nuk është aspak i lumtur, ndërsa Penélope Cruz dhe Edward Norton luajnë fqinjët e tyre, të dashuruar dhe të qetë.
Kontrasti mes dy çifteve krijon situata jashtëzakonisht komike dhe të sikletshme, por filmi arrin gjithashtu të prekë plagët, pakënaqësitë dhe problemet e marrëdhënieve njerëzore.
2. “The Odyssey”
Pritja e gjatë dhe gjithë zhurma mediatike rreth filmit të ri të Christopher Nolan duket se ia kanë vlejtur.
I frymëzuar nga poema epike e Homerit, “Odisea”, filmi sjell një aventurë madhështore me Matt Damon në rolin e Odiseut. Kritika vlerëson mënyrën se si Nolan kombinon aksionin spektakolar me një histori më të thellë mbi moralin, përgjegjësinë dhe zgjedhjet njerëzore.
Në film luajnë gjithashtu Anne Hathaway, Robert Pattinson, Tom Holland dhe Zendaya.
3. “Nirvanna the Band the Show the Movie”
Një komedi kanadeze jashtëzakonisht kreative, e përshkruar si një përzierje mes “Back to the Future”, “Bill & Ted’s Excellent Adventure” dhe të “Borat”.
Filmi ndjek dy personazhe që ëndërrojnë të bëhen superyje dhe që, në mënyrë aksidentale, udhëtojnë pas në kohë. Përveç humorit absurd, kritikët vlerësojnë edhe dashurinë e sinqertë që filmi përcjell për qytetin e Torontos dhe miqësinë afatgjatë.
4. “The Sheep Detectives”
Një kombinim mes filmit me aktorë dhe animacionit CGI, që arrin të argëtojë njëkohësisht fëmijët dhe të rriturit.
Hugh Jackman luan George, një bari i dashur që çdo natë u lexon deleve të tij histori misteri. Kur ai vritet, delet vendosin të përdorin njohuritë e marra nga librat për të zbuluar autorin e krimit.
Kritikët veçojnë veçanërisht Julia Louis-Dreyfus, e cila i jep zërin Lily-t, deles më të zgjuar të tufës.
5. “28 Years Later: The Bone Temple”
Vazhdimi i sagës së “28 Years Later” vjen në listë si një nga surprizat më të forta të vitit.
Filmi sjell terrorin dhe skenat brutale që priten nga një film me zombie, por ndërthur edhe elemente të pazakonta të horrorit folklorik, humorit dhe kulturës britanike.
Kritikët e përshkruajnë si një film ekstremisht origjinal dhe të guximshëm.
6. “My Father’s Shadow”
I vendosur në Nigeri në vitin 1993, filmi rrëfen historinë e një babai dhe dy djemve të tij të vegjël gjatë një dite në Lagos.
Historia nis si një dramë familjare, por gradualisht shndërrohet në një portretizim të tensioneve politike të vendit gjatë zgjedhjeve presidenciale.
Kritikët vlerësojnë veçanërisht interpretimin e Sope Dirisu dhe mënyrën se si filmi e tregon historinë nga këndvështrimi i fëmijëve.
7. “Hoppers”
Pixar rikthehet me një aventurë të animuar energjike dhe plot humor.
Personazhi kryesor, Mabel, është një vajzë e re që arrin të transferojë mendjen e saj në një kastor robotik dhe, në këtë mënyrë, të komunikojë me kafshët.
Filmi kombinon humorin, aventurën dhe një mesazh të drejtpërdrejtë për mbrojtjen e mjedisit.
8. “Wuthering Heights”
Regjisorja Emerald Fennell sjell një version të ri dhe shumë më të guximshëm të romanit klasik të Emily Brontë.
Margot Robbie dhe Jacob Elordi luajnë Cathy dhe Heathcliff, dy të dashuruar të ndarë nga diferencat klasore.
Kritikët e përshkruajnë filmin si një interpretim sensual, intensiv dhe vizualisht spektakolar të historisë së famshme, duke theksuar stilin e veçantë të Fennell dhe guximin e saj për t’u larguar nga përshtatjet tradicionale.
9. “Project Hail Mary”
Një blockbuster fantastiko-shkencor që, në vend të aksionit të pandërprerë, përqendrohet te inteligjenca, shkenca dhe zgjidhja e problemeve.
Ryan Gosling luan një biolog që zgjohet me amnezi dhe përpiqet të shpëtojë botën. Filmi bazohet në romanin e Andy Weir, autorit të “The Martian”.
Kritikët e cilësojnë si një film prekës, frymëzues dhe çuditërisht argëtues.
10. “Two Prosecutors”
Drama e regjisorit ukrainas Sergei Loznitsa zhvillohet në vitin 1937, gjatë spastrimeve politike të Stalinit.
Historia ndjek një avokat të ri sovjetik, i cili përpiqet të zbulojë torturat ndaj të burgosurve politikë dhe përballet me një sistem të korruptuar.
Filmi përshkruhet si një thriller i ngadaltë, shqetësues dhe gjithnjë e më klaustrofobik, që pasqyron atmosferën e frikës dhe represionit të një diktature.
11. “Dead Man’s Wire”
Regjisori Gus Van Sant sjell një thriller me humor të zi, i bazuar në një histori të vërtetë.
Bill Skarsgård interpreton Tony Kiritsis, një burrë që rrëmben një ndërmjetës hipotekash, të cilin e fajëson për problemet e tij financiare.
Filmi zhvillohet në vitet ’70 dhe përmban një atmosferë që të kujton “Dog Day Afternoon” të Sidney Lumet. Sipas kritikëve, Skarsgård është veçanërisht i spikatur në rolin e rrëmbyesit.
12. “The Drama”
Zendaya dhe Robert Pattinson luajnë një çift të fejuar, Emma dhe Charlie.Historia merr një kthesë të papritur kur Emma i zbulon Charlie-t një sekret të errët vetëm një javë para dasmës.
Kritikët vlerësojnë mënyrën se si dy aktorët përballojnë ndryshimin e menjëhershëm të tonit të filmit, nga një romancë në një histori shqetësuese dhe provokuese.
Sipas BBC, filmi arrin të kombinojë fuqinë e dy yjeve të Hollywood-it me një histori që ngre pyetje mbi një çështje të ndjeshme dhe kontroverse.
