Hulumtimet e mëparshme e kanë lidhur ngadalësimin e plakjes me mungesën e një vitamine të zakonshme dhe tani një studim i ri i Harvardit duket se i konfirmon këto gjetje.
Studimi, i cili u botua në The American Journal of Clinical Nutrition, zbuloi se marrja e një pilule të përditshme të vitaminës D parandalon shkurtimin e telomereve, një shenjë dalluese e plakjes.
Telomeret, të cilat shpesh krahasohen me majat plastike në skajet e lidhëseve të këpucëve, veprojnë si "skaje mbrojtëse" në fijet e kromozomeve. Teksa njerëzit plaken, telomeret shkurtohen, gjë që mund të rrisë gjasat e shëndetit të dobët dhe vdekshmërisë.
Hulumtimet kanë sugjeruar se nivelet më të larta të vitaminës D në gjak lidhen me telomere më të gjata. Për këtë u studiuan afërsisht 1,000 persona të moshës 50 vjeç e lart të cilët u ndanë në dy grupe, njëri grup mori pilula të vitaminës D çdo ditë dhe grupi tjetër mori pilula placebo.
Pas një periudhe 4-vjeçare, njerëzit që merrnin vitaminë D treguan më pak se gjysmën e shkurtimit të telomereve sesa grupi placebo.
Grupi i vitaminës D kishte gjithashtu më pak sëmundje autoimune dhe shënjues të reduktuar të inflamacionit.
Autorja kryesore e studimit, JoAnn Manson, profesoreshë e mjekësisë në Shkollën Mjekësore të Harvardit, tha se gjetjet “sugjerojnë një rol premtues për vitaminën D në ngadalësimin e plakjes biologjike dhe sëmundjet kronike që lidhen me moshën”.
Studiuesit u habitën që vitamina D ishte e lidhur me një mbrojtje kaq të konsiderueshme kundër shkurtimit të telomereve i tha Manson, Fox News.
“Vitamina D zvogëlon inflamacionin, një shkak kryesor i shkurtimit të telomereve dhe sëmundjeve kronike të plakjes”, tha ajo.
Ekipi zbuloi se njësia 2000 e vitaminës D në ditë ishte "shumë e sigurt", pa efekte anësore ose ngjarje të padëshirueshme.
"Më shumë nuk është domosdoshmërisht më mirë, dhe doza shumë të larta - të tilla si më shumë se 10,000 IU/d - mund të shoqërohen me nivele të larta të kalciumit në gjak ose urinë dhe toksicitet", - paralajmëroi ajo.
Manson theksoi se marrja e një suplementi nuk është zëvendësim për një dietë ushqyese dhe një stil jetese të shëndetshëm. ©LAPSI.al
