Aston Martin zbuloi të premten një supermakinë të re për koleksionistët e pasur. Edhe pse prodhuesi i makinave po përballet me vështirësi financiare ai po zgjeron gamën e modeleve ultra-luksoze si një përpjekje për të ulur humbjet.
Kompania britanike zbuloi “Valen”, makinën e saj sportive më të fuqishme deri më sot me motor përpara. Makina u prezantua në Javën e Makinave Monterey në Kaliforni të premten. E pajisur me një motor V12 me dy turbo 5.2 litra, modeli i ri mund të arrijë nga 0 në 60 mph në 3 sekonda dhe të arrijë një shpejtësi maksimale prej 325 km/orë.
Do të ndërtohen vetëm 150 makina të tilla dhe ajo do të kushtojë rreth 2 milionë dollarë, sipas një zëdhënësi të kompanisë.
Rritja e shitjeve të modeleve të nivelit të lartë mund ta ndihmojë Aston Martin të rrisë të ardhurat e saj, ndërsa përballet me humbje dhe borxhe në rritje.
Muajin e kaluar, prodhuesi i automjeteve siguroi një financim prej 643 milionë eurosh. Marrëveshja ka ngjallur reagime nga disa mbajtës ekzistues të obligacioneve, të cilët po kërcënojnë të ndërmarrin veprime ligjore sepse, sipas tyre, janë lënë mënjanë.
Sipas Bloomberg, kompania ka pasur vështirësi në shtyrjen përpara të planit të rimëkëmbjes që kur shpëtoi nga falimenti në vitin 2020. Vonesat në lançimin e modeleve të reja dhe problemet e cilësisë janë përkeqësuar nga ngadalësimi në tregun kinez dhe tarifat amerikane, duke e bërë të vështirë për Aston Martin të kthehet në fitimprurësi.
Në tremujorin e dytë, shitjet e modeleve më të mira dhe ultra-luksoze të Aston Martin, të cilat kompania i quan "speciale", u rritën në 122 makina nga vetëm 4 një vit më parë, falë modeleve si “Valhalla” prej 1 milion dollarësh. Kjo ndihmoi në rritjen e të ardhurave me 62% në 418 milionë euro. Megjithatë, kompania regjistroi një humbje para taksave prej 104 milionë eurosh.
“Valhalla”, supermakina e parë hibride plug-in e Aston Martin, filloi prodhimin 4 vjet me vonesë. Në fund të qershorit, borxhi neto i kompanisë ishte 1.8 miliardë euro. ©LAPSI.al
