Trupi i pajetë i 20-vjeçarit francez u gjet mëngjesin e sotëm në zonën bregdetare të Ksamilit, pas një konflikti që dyshohet se nisi në një prej lokaleve të natës në zonë dhe përfundoi me vrasjen e tij me thikë.
Viktima, Miguel Mendes, shtetas francez, ndodhej në Ksamil për pushime. Klient në club-in “Principotes”, ai dyshohet se u përfshi në një konflikt me një prej punonjësve të lokalit.
Bëhet fjalë për Sokrat Vatën, 29 vjeç, i cili punonte si truproje në club dhe tashmë është arrestuar nga policia si i dyshuar për vrasjen e turistit francez.
Pas ngjarjes, Vata dyshohet se u largua nga zona dhe u vu në kërkim. Pas disa orësh, ai u kap në një pikë kontrolli në Levan.
29-vjeçari ishte fshehur në bagazhin e një automjeti, siç tregojnë pamjet më lart. Efektivët e ndaluan automjetin që drejtohej nga dy shtetas turq dhe, gjatë kontrollit, zbuluan të dyshuarin, që përfundoi në pranga.
Sherri në club, më pas vrasja
Sipas të dhënave paraprake të hetimit, konflikti mes 20-vjeçarit francez dhe truprojës së club-it dyshohet se ka nisur brenda ambienteve të “Principotes”.
Ende nuk është e qartë se çfarë e shkaktoi përplasjen, por sipas të dhënave të para flitet se shkak i sherrit ka qenë ngacmimi i një vajze. Përplasja është përshkallëzuar dhe ka përfunduar jashtë ambienteve të lokalit, ku turisti francez u godit me thikë.
Miguel Mendes u gjet më pas pa shenja jete në plazhin e Ksamilit.
Policia rrethoi vendin e ngjarjes dhe grupi hetimor nisi mbledhjen e provave dhe marrjen e dëshmive. Pjesë e hetimit pritet të jenë edhe pamjet e kamerave të sigurisë së club-it dhe zonës përreth, të cilat mund të ndihmojnë në rindërtimin minutë pas minute të konfliktit.
Pas arrestimit, Sokrat Vata pritet të merret në pyetje nga hetuesit për të dhënë versionin e tij mbi ngjarjen. Hetimi duhet të përcaktojë gjithashtu motivin e konfliktit, dinamikën e saktë të vrasjes dhe nëse ka persona të tjerë që kanë dijeni ose kanë qenë të përfshirë në ngjarje.
Pushuesit të tronditur
Vrasja ka shkaktuar tronditje te pushuesit në Ksamil, veçanërisht te familjet që ndodhen në zonë me fëmijët.
“Është një ngjarje e rëndë, jemi me pushime me fëmijët. Si t’u themi që është vrarë dikush? Ata do të tremben”, tha një prej pushuesve.
Një tjetër pushues e cilësoi ngjarjen të dhimbshme dhe të papranueshme.
“Na vjen shumë keq që ndodhi. Ky është një krim”, u shpreh ai./ Lapsi.al
