Rrjetet kryesore televizive në Shtetet e Bashkuara pezulluan transmetimin e aktiviteteve të presidentit Donald Trump, në shenjë hakmarrjeje ndaj dëbimit të CNN, Politico dhe MS NOË nga Shtëpia e Bardhë.
Trump e njoftoi ndalimin e mediave në fjalë ditën e premte, kur dhe i akuzoi për “fabrikim gënjeshtrash” mbi administratën e tij. Vetë grupet mediatike deklaruan se gazetarëve të tyre u ishte mohuar hyrja në selinë presidenciale.
Tre organet informative njoftuan se do ta padisin administratën Trump në përpjekje për të mbrojtur parimin se, qeveria nuk vendos atë që raporton shtypi.
Vetëm pak më vonë, Shtëpia e Bardhë i dha jetë kanalit të saj në streaming, Trump TV, që është aktiv gjatë gjithë ditës dhe gjatë gjithë javës me aktivitetet e presidentit.
Edhe media të tjera amerikane, mes të cilave New York Times dhe Washington Post, kanë njoftuar gjithashtu se nuk do të marrin pjesë në mbulimin e eventeve të kreut të shtetit.
Për pasojë, asnjë rrjet televiziv nuk transmetoi pamjet e Trump teksa hipte në Air Force One dhe as mbërritjen e tij në Nju Jork për të ndjekur asamblenë e përgjithshme të OKB-së.
Trump mori pjesë edhe në një ceremoni për përurimin e platformës së uljes së helikopterëve në Shtëpinë e Bardhë. Eventi u transmetua në website-n e presidencës, por komentet e tij nuk dëgjoheshin.
Më vonë, presidenti u shfaq në një televizion pas një takimi me kryebashkiakun e Nju Jorkut, Zohran Mamdani, i cili theksoi se të gjithë përfaqësuesit e mediave duhet të priten në konferencat e shtypit.
