Ministria e Mjedisit i ka dorëzuar Komisionit Evropian draftin e parë për ndryshimet në ligjin për zonat e mbrojtura, në kuadër të negociatave për Kapitullin 27. Sipas burimeve, drafti synon përafrimin me Direktivën Evropiane të Habitateve, por nuk adreson ndryshimet më të debatueshme të ligjit aktual.
Në dokument mungojnë dispozita që ndalojnë ndërtimin e resorteve dhe strukturave turistike në parqet kombëtare, si edhe ndryshimet për zonimet dhe aktivitetet ekonomike në zonat e mbrojtura. Kjo ka ngritur shqetësime se ligji mund të vazhdojë të lejojë projekte të konsideruara "me interes publik madhor", edhe në raste kur ndikimi mjedisor është negativ.
Sipas burimeve, Komisioni Evropian e ka refuzuar draftin e parë dhe i ka kërkuar qeverisë shqiptare të paraqesë një version të ri, duke theksuar nevojën për një qasje më serioze dhe në përputhje të plotë me legjislacionin evropian. Ndryshimet përfundimtare pritet të hartohen deri në fund të vitit, me synimin që ligji i ri të hyjë në fuqi gjatë gjysmës së parë të vitit 2027.
