Policia e Tiranës ka dhënë detaje të reja lidhur me aksidentin e rëndë të ndodhur pasditen e sotme te rrethrrotullimi i TEG-ut, ku humbën jetën dy persona.
Sipas njoftimit zyrtar, janë identifikuar dy personat që udhëtonin në kamionin pompë betoni, i cili doli nga rruga dhe përfundoi në nivelin e poshtëm të aksit rrugor TEG–Elbasan.
Viktimat janë, Mohamed Lotf rreth 30 vjeç, drejtuesi i kamionit pompë betoni, i cili humbi jetën në vendngjarje, si dhe Mohamed Ali, rreth 44 vjeç, pasagjeri i mjetit, i cili ndërroi jetë në spital si pasojë e plagëve të marra.
I plagosur ndërkohë ka mbetur Roland Nuri.
Aksidenti i rëndë ndodhi pasi kamioni pompë betoni u përplas me një automjet, më pas çau barrierat mbrojtëse dhe ra në pjesën e poshtme të aksit rrugor.
Njoftimi i plotë i policisë:
Tiranë/Informacion shtesë
Në vijim të informacionit paraprak të dhënë më herët për aksidentin e ndodhur te rrethrrotullimi i TEG-ut, ju informojmë se janë identifikuar dy personat që udhëtonin në kamionin (pompë betoni) konkretisht shtetasit e huaj:
-M. L., rreth 30 vjeç, drejtuesi i kamionit, i cili humbi jetën në vendngjarje;
-M. A., rreth 44 vjeç, pasagjeri, i cili, pavarësisht ndihmës mjekësore, ka ndërruar jetë në spital.
Ndërkohë, drejtuesi i automjetit tjetër, shtetasi R. N., rreth 28 vjeç, ndodhet në spital, jashtë rrezikut për jetën.
Grupi hetimor vijon punën për dokumentimin e plotë të rrethanave dhe shkakut të aksidentit.
