Një plan i pazakontë që ka shkaktuar reagime të forta në Gjermani është paraqitur nga këshilltari i qytetit të Mannheimit, Julien Fera. Ai dëshiron ta shndërrojë qytetin në një destinacion për nudistët dhe çiftet që shkëmbejnë partnerët. Madje ai ka shkuar deri aty sa të propozojë organizimin e festave seksuale edhe në bashki.
Politikani 35-vjeçar, udhëheqësi i lëvizjes liberale "Die Mannheimer" pretendon se qëllimi i tij është të thyejë tabutë shoqërore rreth jo-monogamisë dhe në planin afatgjatë ta shndërrojë Mannheimin në një "parajsë për çiftet që shkëmbejnë partnerë".
Ai thotë se rreth 50 persona e kanë kontaktuar tashmë dhe kanë shprehur interes për të marrë pjesë. Megjithatë, plani është ende shumë larg zbatimit, pasi ai duhet së pari të marrë lejen përkatëse nga këshilli bashkiak.
"Për momentin, po përpiqem të zbuloj se cilët nga ata që më kanë kontaktuar janë vërtet të interesuar", - tha Fera për “The Telegraph”. Ai tha se disa janë tashmë pjesë e komunitetit lokal të çifteve që shkëmbejnë partnerë, ndërsa planifikon të takohet me të tjerë personalisht në ditët në vijim.
"Thyerja e tabuve"
Fera, i cili ka fituar nofkën "këshilltari më i çmendur i qytetit të Gjermanisë", pohon se iniciativa e tij ka edhe karakter politik.
Siç e shpjegoi ai, ai dëshiron të zvogëlojë stigmën sociale kundër personave që shkëmbejnë partnerë nga njëra anë dhe të promovojë një vizion më të gjerë për Mannheimin, të frymëzuar nga vendpushimi i famshëm francez i Cap d'Agde nga ana tjetër.
"Nga njëra anë, dua ta bëj të qenit një person që shkëmben partnerë më pak tabu. Nga ana tjetër, dua të promovoj vizionin tim për një parajsë nudiste për ata që shkëmbejnë partnerë në Mannheim", - tha ai.
Shkëmbimi i partnerëve është një formë konsensuale e marrëdhënies jo-monogame, e cila ka komunitete të organizuara dhe hapësira të veçanta në disa vende evropiane.
Administrata e Mannheimit, deri më tani, nuk duket se e ndan entuziazmin e këshilltarit të qytetit. Një zëdhënës i bashkisë i tha rrjetit gjerman SWR se bazuar në informacionin e disponueshëm deri më tani, ka "dyshime të forta" si në lidhje me pranimin ashtu edhe në fizibilitetin e planeve të Feratit.
Kjo nuk është hera e parë që politikani 35-vjeçar ka ndezur debat me iniciativat e tij. Vitin e kaluar, ai propozoi organizimin e një "misioni faktmbledhës" 8-ditor në Cap d'Agde të Francës, një nga destinacionet më të njohura të Evropës për nudistët dhe swingerët.
Sipas planit të tij, një vizitë e tillë mund të jetë hapi i parë në krijimin e një identiteti përkatës turistik dhe argëtues në Mannheim, i cili - siç argumenton ai - mund t'i japë qytetit edhe një nxitje ekonomike.
Megjithatë, për momentin, plani ambicioz i Julien Ferat mbetet më shumë një sfidë dhe vizion politik sesa një realitet, me mundësinë e një feste swingers brenda bashkisë së Mannheim-it që tashmë ka hasur reagime të konsiderueshme. ©LAPSI.al
