Gjykata e Durrësit ka lënë në burg ish-drejtoreshën e filialit të Postës Shqiptare në Durrës, Elisabeta Mataj. Masa "arrest në shtëpi" është caktuar për ish-shefen e financës, Valbona Duni, dhe ish-arkëtaren, Paola Dana. Të treja akuzohen për përvetësimin e 69 milionë lekëve të rinj. Vendimi u dha këtë të shtunë, pas shqyrtimit të kërkesës së Prokurorisë. Gjykata e cilësoi të ligjshëm ndalimin e tre zyrtareve, të cilat hetohen për veprën penale "Vjedhja duke shpërdoruar detyrën", kryer në bashkëpunim.
Sipas hetimeve, gjatë muajve prill dhe maj 2026, ato dyshohet se kanë përvetësuar rreth 69 milionë lekë të rinj nga fondet e filialit të Postës Shqiptare në Durrës. Me vendimin e gjykatës, Valbona Duni dhe Paola Dana do të lirohen nga paraburgimi dhe do ta vuajnë masën e sigurisë në banesë, nëse nuk mbahen të arrestuara për ndonjë vepër tjetër penale. Ndërkohë, hetimet vijojnë për të zbardhur plotësisht skemën dhe për të identifikuar persona të tjerë që mund të kenë qenë të përfshirë në këtë rast.
